Тоҷикӣ
Русский
English
Аз 19 то 28 октябри соли 2026 дар Донишгоҳи байналмилалии сайёҳӣ ва соҳибкории Тоҷикистон даври ҷамъбастии Озмуни ҷумҳуриявии «Илм — фурӯғи маърифат» баргузор гардида истодааст. Дар ин марҳилаи ниҳоии озмун 700 нафар иштирокчӣ аз гурӯҳҳои гуногуни иҷтимоӣ ва муассисаҳои таълимии кишвар аз рӯйи ҳашт номинатсия барои нишон додани дониш, маҳорат ва қобилиятҳои илмии худ рақобат менамоянд.
Озмуни ҷумҳуриявии «Илм — фурӯғи маърифат» бо ташаббуси Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон баргузор гардида, ба рушди тафаккури илмӣ, густариши фарҳанги донишандӯзӣ, ҷалби наврасону ҷавонон ба омӯзиши илмҳои дақиқу табиӣ ва дарёфту дастгирии истеъдодҳои ҷавон равона шудааст.
Дар партави сиёсати маорифпарварона ва илмпарваронаи Пешвои миллат, инчунин бо дарназардошти дастуру супоришҳои Президенти Академияи миллии илмҳои Тоҷикистон, академик Хушвахтзода Қобилҷон Хушвахт, оид ба рушди илмҳои бунёдӣ ва амалӣ, тақвияти робитаи илм бо маориф ва дастгирии олимону ҷавонони соҳибистеъдод, кормандони Институти математикаи ба номи академик А. Ҷӯраеви АМИТ дар баргузории даври ниҳоии озмун фаъолона иштирок доранд.
Нақши олимон дар чунин чорабиниҳои ҷумҳуриявӣ танҳо бо арзёбии дониши иштирокчиён маҳдуд намегардад, балки ба дарёфти чеҳраҳои нави илмӣ, ҳавасманд намудани наврасону ҷавонон ба таҳқиқот ва фароҳам овардани замина барои омодасозии мутахассисони соҳибкасб низ мусоидат менамояд.
Дар даври ҷамъбастии озмун намояндагони Институти математикаи ба номи академик А. Ҷӯраеви АМИТ ҳамчун аъзои ҳайати ҳакамон ва Комиссияи апеллятсионӣ фаъолият намуда, барои таъмини шаффофият, риояи меъёрҳои арзёбӣ ва баррасии масъулонаи натиҷаҳои озмун саҳм мегузоранд.
Аз ҷумла, Раҳимзода Алишер Орзу, директори Институти математикаи ба номи академик А. Ҷӯраеви АМИТ, раиси Комиссияи апеллятсионии озмун мебошад. Комиссияи мазкур дар доираи ваколатҳои худ муроҷиат ва эътирозҳои иштирокчиёнро баррасӣ намуда, барои риояи тартиби муқарраршуда ва таъмини адолат дар ҷараёни озмун мусоидат менамояд. Иҷрои ин вазифаи масъул ба зарурати риояи принсипҳои шаффофият, воқеъбинӣ ва масъулияти касбӣ дар баргузории озмунҳои ҷумҳуриявӣ мувофиқат мекунад.
Каримзода Олим Худойбердӣ, муовини директори институт оид ба илм ва таълим, ҳамчун узви ҳайати ҳакамони номинатсияи «Математика» иштирок дорад. Ҳамзамон, Сафарзода Эшмат, ходими пешбари институт ва номзади илмҳои физикаю математика, дар ҳамин номинатсия ба арзёбии донишу қобилияти математикии довталабон машғул мебошад.
Иштироки мутахассисони варзидаи соҳаи математика дар ин номинатсия ба муайян намудани сатҳи омодагии иштирокчиён, рушди тафаккури мантиқӣ ва ҳавасманд намудани насли наврас ба омӯзиши амиқи илмҳои риёзӣ мусоидат мекунад. Ин самт бо ҳадафҳои рушди илмҳои дақиқ ва татбиқи дастовардҳои илмӣ дар низоми маорифи кишвар ҳамоҳанг мебошад.
Ҳакимзода Зумрат Ҷамшед, ходими илмии Институти математикаи ба номи академик А. Ҷӯраеви АМИТ, узви ҳайати ҳакамони номинатсияи «Технологияҳои иттилоотӣ» буда, дар арзёбии дониш ва малакаҳои иштирокчиён дар соҳаи технологияҳои иттилоотӣ саҳм мегузорад.
Дар шароити рушди босуръати технологияҳои рақамӣ ва зеҳни сунъӣ ҷалби ҷавонон ба омӯзиши технологияҳои иттилоотӣ аҳаммияти махсус дорад. Омода намудани насли дорои тафаккури рақамӣ, қобилияти таҳлил ва малакаи ҳалли масъалаҳо яке аз заминаҳои муҳими рушди илму технология ба шумор меравад.
Ҳамчунин, Гулбоев Бахтиёр, мудири шуъбаи таҳлили математикии Институти математикаи ба номи академик А. Ҷӯраеви АМИТ ва номзади илмҳои физикаю математика, узви ҳайати ҳакамони номинатсияи «Зеҳни сунъӣ ва барномасозӣ» мебошад. Ӯ дар арзёбии донишҳои назариявӣ ва малакаҳои амалии довталабон дар самтҳои зеҳни сунъӣ ва барномасозӣ иштирок менамояд.